Úr FA bikarnum

Ófarir Englandsmeistara Liverpool halda áfram. Liverpool féll út úr FA bikarnum eftir 3:2 tap fyrir Manchester United í Manchester. Það gengur ekkert að komast áfram í þessari keppni þessi árin.

Það var hraði í leiknum frá upphafi. Heimamenn fengu fyrsta færið á 10. mínútu þegar Mason Greenwood komst inn í vítateiginn en Alisson Becker varði. Liverpool komst betur inn í leikinn og komst yfir á 18. mínútu. Roberto Firmino sendi hárnákvæma sendingu inn í vítateiginn á Mohamed Salah. Dean Henderson kom út á móti honum en Mohamed lyfti boltanum listilega yfir hann og í markið. Frábært mark. Liverpool náði þó ekki að halda forystunni lengi. Á 26. mínútu náði Manchester United skyndisókn. Marcus Rashford lék fram vinstri kantinn og sendi boltann yfir til hægri á Mason sem fékk boltann í vítateignum þaðan sem hann skoraði neðst í fjærhornið. Leikurinn var jafn til hálfleiks og staðan var jöfn þegar hálfleiksflautið gall. 

Manchester United fékk óskabyrjun í síðari hálfleik og komst yfir eftir þrjár mínútur. Mason sendi inn fyrir vörnina. Ryhs Williams missti boltann framhjá sér. Marcus slapp í gegn vinstra megin og skoraði neðst í hornið fjær. Liverpool lagði ekki árar í bát og tíu mínútum seinna var staðan orðin jöfn. Roberto sendi á Mohamed og hann skoraði af öryggi úr miðjum vítateignum. James Milner lék boltann fara og þar með var Mohamed frír. Vel gert. 

Liverpool spilaði mjög vel í framhaldinu. Nokkrum mínútum seinna sendi Mohamed á Trent Alexander-Arnold. Hann fékk boltann í góðu skotfæri í vítateignum en Dean varði. Á 67. mínútu lagði Roberto upp færi fyrir Mohamed en Dean varði aftur. Mohamed hefði átt að skora og svo var varamaðurinn Sadio Mané í færi við hliðina á honum. Á þessum leikkafla spilaði Liverpool mjög vel. 

Þegar 12 mínútur voru eftir fékk Manchester United ódýra aukaspyrnu rétt uan vítateigs. Varamaðurinn Bruno Fernandes tók aukaspyrnuna og skoraði með föstu skoti neðst í hægra hornið. Alisson hefði átt að verja og mjög gremjulegt að lenda undir eftir að hafa verið betra liðið lengi vel í síðari hálfleik. 

Liverpool reyndi að jafna en ekkert gekk. Edinson Cavani var nærri því búinn að skora þegar mínúta var eftir en skalli hans fór í stöng. Liverpool mátti þola tap og enn eitt árið kemst liðið ekkert áleiðis í FA bikarnum. 

Liverpool spilaði vel á löngum köflum í leiknum en heppnin var ekki með liðinu. Batamerki voru á liðinu. Það hlýtur að fara að koma að því að betur fari að ganga. Það getur bara ekki annað verið!

Manchester United: Henderson, Wan-Bissaka, Lindelöf, Maguire, Shaw, McTominay, Pogba, Greenwood (Fredat 66. mín.) van de Beek, Fernandes (66. mín.), Rashford (Martial 86. mín.) og Cavani. Ónotaðir varamenn: de Gea, Mata, James, Telles, Matic og Tuanzebe.

Mörk Manchester United: Mason Greenwood (26. mín.), Marcus Rashford (48. mín.) og Bruno Fernandes (78. mín.).

Gul spjöld: Victor Lindelöf og Paul Pobga.

Liverpool: Alisson, Alexander-Arnold, R. Williams, Fabinho, Robertson, Wijnaldum (Mané 62. mín.), Thiago (Shaqiri 81. mín.), Milner, Salah, Firmino (Origi 81. mín.) og Jones. Ónotaðir varamenn: Kelleher, Oxlade-Chamberlain, Minamino, Tsimikas, Phillips og N. Williams.

Mörk Liverpool: Mohamed Salah (18. og 58. mín.).

Gul spjöld: Fabinho Tavarez og Sadio Mané.

Áhorfendur á Old Trafford: Engir. 

Maður leiksins: Mohamed Salah. Egyptinn spilaði mjög vel og skoraði tvö mörk. Reyndar hefði hann átt að skora þrennu.


Jürgen Klopp: Ég sá mörg skref tekin í rétta átt. Við vitum alveg hvað við þurfum að gera. Við þurfum að taka skref í rétta átt og við höfum þegar gert það en það eru nokkur skref eftir.   


- Mohamed Salah er nú búinn að skora 19 mörk á leiktíðinni. 

- Liverpool hefur ekki komst lengra en í 5. umferð í FA bikarnum frá því á leiktíðinni 2014/15.

- Alisson Becker spilaði sinn fyrsta leik í FA bikarnum frá því hann kom til Liverpool.