Van Dijk á enn langt í land

Jürgen Klopp segir meiðslameðferðina á Virgil van Dijk ganga vel, en hann eigi þó enn langt í land með að vera leikhæfur. Hann vill þó ekki nefna neinar tímasetninga í þeim efnum.

Van Dijk, sem hefur verið frá síðan í október, setti nýlega inn færslu á Twitter sem sýnir hann byggja upp þolið af krafti á þrekhjólinu í æfingasalnum í Kirkby. Þar er ekki að sjá, í það minnsta fyrir þá sem ekki þekkja til, að nokkuð sé að há honum. Klopp er ánægður með hvernig endurhæfingin gengur. „Þetta gengur vel en það er enn langt í land, þetta eru þannig meiðsli. Ég er mjög ánægður að sjá þessi myndskeið frá honum því þau sýna að hann er að komast í betra stand. En það mun taka langan tíma, þannig er það bara.“

Klopp hefur ekki viljað nefna neinar tímasetningar á því hvenær van Dijk verður leikhæfur. Frank de Boer landsliðsþjálfari Hollendinga hefur hins vegar sagt að eftir að hafa talað við van Dijk á Facetime sé hann vongóður um að varnarmaðurinn geri verið með hollenska landsliðinu á EM í sumar, ef ekkert bakslag kemur. Almennt telja fjölmiðlar að hann muni ekki koma við sögu hjá Liverpool fyrr en undir lok tímabilsins.