| Sf. Gutt

Fyrir tíu árum!

Í dag eru tíu ár liðin frá því Liverpool Football Club var bjargað ef þau orð mætti nota um það þegar John Henry og félagar náðu félaginu okkar úr höndum þeirra George Gillett og Tom Hicks. Mikið hafði gengið á dagana á undan og baráttan um Liverpool F.C. fór fram fyrir rétti og lengi vel var tvísýnt um hvort meirihluti stjórnar Liverpool hefði sitt fram í að selja félagið til New England Sports Ventures. Allt fór á besta veg og John Henry og félag hans eignaðist Liverpool F.C. Eigendaskiptin voru staðfest föstudaginn 15. október 2010. 

Það hefur svo sem ekki allt gengið smurt frá því John og félagar hans eignuðust Liverpool F.C. Það er líka sjaldan sem allt gengur snuðrulaust í lífi þessa mikla knattspyrnufélags. Að minnsta kosti erum við stuðningsmenn Liverpool orðnir ýmsu vanir í gegnum árin!

Það er þó ekki ekki vafi á því að það var algjörlega nauðsynlegt að ná félaginu af þeim George og Tom. Í raun, ef allt hefði farið á versta veg, hefði félagið getað orðið gjaldþrota með ófyrirsjáanlegum afleiðingum. 


Nú gengur rekstur félagsins eins vel og vænta má í miðjum heimsfaraldri. Síðustu ár hafur félagið styrkst hægum en öruggum skrefum innan vallar jafnt sem utan. Stækkun Anfield var lykilatriði í sambandi við tekjuöflun en eigendur Liverpool ákváðu að vinna að stækkun frekar en að reisa nýjan leikvang. Fá knattspyrnufélög hafa verið rekin betur á seinustu árum. 





Í þessum mánuði fyrir fimm árum réðu John Henry og FSG Þjóðverjann Jürgen Klopp sem framkvæmdastjóra í stað Brendan Rodgers. Sú ráðning var snilldarráð. Á fimm árum hefur Jürgen stýrt Liverpool til fjögurra titla. Nú síðast í sumar varð Liverpool Englandsmeistari í 19. sinn og í fyrsta skipti frá 1990. Það var ekki nóg með að titillinn langþráði ynnist. Hann vannst með glæsibrag og fágætum yfirburðum!

Stöðu Liverpool F. C. er ekki saman að líkja nú og fyrir tíu árum þegar allt stefndi í strand. Atburðir 15. október fyrir tíu árum, þegar New England Sports Ventures, náði eignarhaldi á Liverpool voru einfaldlega vendipunktur í sögu félagsins á seinni árum!  
TIL BAKA
Nýlegar fréttir
Fleiri fréttir
Fréttageymslan

Allur réttur áskilinn, © Liverpoolklúbburinn á Íslandi, 1999 - 2025

Email: [email protected].

Liverpoolklúbburinn á Íslandi á Facebook