Landsleikjafréttir

Landsleikjahrotan er á enda. Ekki er vitað um nein meiðsli hjá leikmönnum Liverpool. Það er auðvitað aðalatriðið að allir komi heilir heim!

Það var einn Englandsmeistari á Íslandi. Divock Origi var varamaður hjá Belgum sem unnu 1:2 á Laugardalsvelli. Fyrrum félagi hans hjá Liverpool Simon Mignolet var í marki Belga. Svo var Guðlaugur Victor Pálsson, sem var fyrrum á mála hjá Liverpool, í íslenska liðinu eins og í síðustu leikjum. 


Nýi framherji Liverpool stóð sig með sóma. Diogo Jotta skoraði tvö mörk og lagði upp eitt þegar Portúgal vann Svíþjóð 3:0.


Neco Williams og Harry Wilson voru í byrjunarliði Wales sem vann Búlgaríu 0:1 á útivelli. Ben Woodburn og Danny Ward, fyrrum markmaður Liverpool, voru meðal varamanna. Neco lagði upp sigurmarkið fyrir nafna sinn Jonny, leikmann Charlton Athetic, sem skoraði framhjá Nikolai Mihaylov. Sá var á mála hjá Liverpool 2007 til 2010. Hann var lengst af þeim tíma í láni hjá Twente í Hollandi. Hann vann þar til titla. 


England tapaði 0:1 fyrir Dönum á Wembley. Christian Eriksen, núverandi leikmaður Inter í Mílanó, skoraði sigurmarkið úr víti. Jordan Henderson kom inn á sem varamaður. Hann og Trent Alexander-Arnold voru í byrjunarliði enskra á sunnudaginn í 2:1 sigri á Belgum. Jordan var þá fyrirliði og spilaði mjög vel.   

Virgil van Dijk og Georginio Wijnaldum voru í liði Hollands sem gerði 1:1 jafntefli á Ítalíu. 

Caoimhin Kelleher var varamarkmaður Íra sem töpuðu 1:0 í Finnlandi. 

Xherdan Shaqiri var í byrjunarliði Sviss í gærkvöldi á móti Þýskalandi. Grannþjóðirnar skildu jafnar 3:3 í Köln.