Diogo Jota keyptur frá Úlfunum

Það opnaðist heldur betur veskið hjá eigendum félagsins eftir töluverða bið okkar stuðningsmanna. Nýjasti leikmaður félagsins er Portúgalinn Diogo Jota !



Jota er 23 ára að aldri og kemur eins og áður sagði frá Wolverhampton Wonderers þar sem hann hefur spilað síðustu þrjú leiktímabil, þar af tvö í úrvalsdeildinni. Alls spilaði hann 67 leiki og skoraði 16 mörk með Úlfunum.

Hann spilaði einnig 14 Evrópudeildar leiki og skoraði í þeim 9 mörk og fyrr í þessum mánuði skoraði hann sitt fyrsta mark með landsliði Portúgal í Þjóðadeildinni.

Jota hafði þetta að segja í sínu fyrsta viðtali hjá Liverpool: ,,Þetta er ótrúlega spennandi stund fyrir mig og fjölskyldu mína. Það er hreint ótrúlegt að vera kominn til liðs við Liverpool - heimsmeistarana sjálfa. Ég get ekki beðið eftir því að byrja."

,,Þetta er eitt besta lið í heimi og í raun eru þeir bestir í heimi ákkúrat núna. Þegar maður horfir á deildina sér maður alltaf Liverpool sem stærsta félagið í landinu, það er því ómögulegt að segja nei. Ég vil vera hér, gera mitt besta  og vonandi verða góð viðbót við liðið í framtíðinni."

Jota mun spila í treyju númer 20 hjá félaginu en það er gamla númerið hans Adam Lallana. Hann hóf ferilinn hjá Pacos de Ferreira í Portúgal en gekk svo til liðs við Atletico Madrid árið 2016. Nuno Esperito Santo, núverandi stjóri Úlfanna, fékk Jota að láni til sín hjá Porto tímabilið 2016-17 og þeir fylgdust svo að til Englands tímabilið þar á eftir.



Hann var markahæstur hjá félaginu á sínu fyrsta tímabili með 17 mörk þegar félagið fór upp í úrvalsdeild og síðustu tvö tímabil hafa Úlfarnir náð 7. sæti í deildinni.

,,Ég held að ég sé leikmaður sem hugsi um liðið fyrst og fremst," bætir Jota við. Ég spila fremst á vellinum og mitt hlutverk er að finna leið til að skora mörk og leggja þau upp og það er eitthvað sem liðsfélagar mínir mega búast við - að ég muni alltaf leggja mig allan fram. Ég reyni ávallt að hjálpa liðinu eins mikið og ég get."

,,Stuðningsmennirnir geta treyst á mig vegna þess að ég er einn af þeim og legg mig ávallt fram fyrir þeirra hönd."