Alvöru leikur!

Sumir segja að leikurinn um Samfélagsskjöldinn sé bara ómerkilegur vináttuleikur. Jürgen Klopp er ekki sammála því og vill vinna leikinn. Hann segir að leikur á Wembley um verðlaunagrip hljóti að skipta máli!

,,Þetta er ekki æfingaleikur. Þetta er ekki vináttuleikur. Þetta er alvöru leikur! Svo erum við að spila við Arsenal. Við munum því reyna okkar allra besta til að vinna!"

Jürgen Klopp sagði að sumir hefði sagt í fyrra að Stórbikarinn og Heimsmeistarakeppni félagsliða væru keppnir sem skiptu ekki máli. En hann hefði fundið það þegar Liverpool vann þessar keppnir að þær skiptu sannarlega máli og það hefði verið frábært að vinna þær!

Liverpool mætti Manchester City í Skjaldarleiknum í fyrra. Liverpool spilaði mjög vel en heppnin var með Manchester City sem vann 5:4 í vítaspyrnukeppni eftir 1:1 jafntefli. Vonandi fellur sú heppni sem þarf með Liverpool á Wembley í dag!