Titill í fyrsta leik

Ferill Dejan Lovren hjá Zenit Saint Petersburg hefði ekki getað byrjað betur. Hann vann titil í fyrsta leik sínum með félaginu. Sannkölluð draumabyrjun hjá Króatanum.

Zenit vann í dag 2:1 sigur á  Lokomotiv Moskvu í leiknum um Stórbikar Rússlands. Leikurinn er leikur milli landsmeistara og bikarmeistara í Rússlandi. Sem sagt opnunarleikur nýrrar leiktíðar eins og tíðkast í flestum löndum. Zentit vann tvöfalt í Rússlandi á síðasta keppnistímabili en Lokomotiv fékk boð í leikinn fyrir að hafna í öðru sæti í deildinni. Þetta var í sjötta skipti sem Saint Petersburg vinnur Stórbikar Rússlands. 

Dejan stóð vaktina í vörn Zenit og spilaði allan leikinn. Króatinn fór til Zenit í lok júlí og er kominn með sinn fyrsta titil hjá félaginu. Dejan varð Evrópu- og Englandsmeistari með Liverpool. 


Hann vann bæði deild og bikar í Króatíu með Dinamo Zagreb á leiktíðinni 2008/09. Í Frakklandi varð Dejan bikarmeistari með Lyon 2012. Þess má til gamans geta að  Aly Cissokho, fyrrum lánsmaður Liverpool, spilaði úrslitaleikinn með Dejan.