Sakna allra!

Það styttist í að Jürgen Klopp geti hitt leikmenn sína eftir langt hlé. Hann segist sakna þeirra allra þó hann hafi séð þá í gegnum skjái síðustu vikur.  

,,Ég sakna allra. Við allir söknum hvors annars og þess að vera ekki saman því okkur líkar vel að vinna saman. Við höfum mikið samband í gegnum WhatsApp hópa, í gegnum síma og Face time. Við sjáum vissulega heilmikið framan í hvora aðra en ekki eins og við myndum vilja eða erum vanir."

Leikmenn Liverpool hafa æft samkvæmt áætlunum þjálfaraliðs Liverpool. Bæði hver leikmaður í sínu horni og eins saman í gegnum samfélagsmiðla. Þetta allt mun hafa gengið vel en ekkert kemur í stað þess að hittast á æfingavellinum og eiga samneyti þar. 

Jürgen Klopp hefur dundað sér við ýmislegt síðustu vikurnar eins og aðrir. Hann segist hafa horft á nokkrar bíómyndir og þáttaraðir, lesið bækur og hlustað á tónlist. 

Svo lærði hann eitt og annað nýtt. Hann lærði til dæmis að hnýta bindishnút og eins lærði hann á uppþvottavélina heima hjá sér. Svo útbjó Jürgen eggjahræru í fyrsta sinn. Ulla, kona hans, var nokkuð ánægð með hræruna en hann sagði að hún hefði samt ekki beðið hann um að matreiða þennan ágæta rétt aftur!