Óheppnin eltir Ben

Óhætt er að segja að óheppnin elti Ben Woodburn. Hann hefur tvívegis fótbrotnað á leiktíðinni. Ben var lánaður til Oxford United í fyrrasumar og byrjaði vel þar. Í október brotnaði bein í fæti og fór hann þá aftur heim til Liverpool í sjúkraþjálfun. 

Í desember brotnaði svo sama bein í hinum fætinum! Á þeim tímapunkti var Ben rétt við að fara aftur til Oxford eftir að hafa náð sér eftir meiðslin sem hann varð fyrir í október. Það er því óhætt að segja að óheppnin elti Ben en meiðsli settu líka strik í reikninginn hjá honum á síðasta keppnistímabili en þá var hann um tíma í láni hjá Sheffield United. 

Ben ætti að vera búinn að ná sér núna. Hann er á hinn bóginn núna í leikhléi eins og aðrir knattspyrnumenn á Bretlandi og víðast hvar.


Ben Woodburn er eins og allir veita yngsti markaskorari í sögu Liverpool. Hann var aðeins 17 ára og 45 daga gamall þegar hann skoraði í 2:0 sigri á Leeds United í Deildarbikarnum í nóvember 2016. Hingað til hefur hann leikið 11 leiki með aðalliði Liverpool.