Frestun framlengd

Frestun á keppni í efstu knattspyrnudeildum Englands í karla- og kvennaflokki hefur verið framlengd. Keppni, vegna útbreiðslu Covid – 19 veirunnar, var frestað í síðustu viku til fyrstu helgar í apríl. Í dag var ákveðið á fundi að framlengja frestun á keppni til 30. apríl hið minnsta!

Á fundinum í dag komu saman fulltrúar Úrvalsdeildarinnar, Ensku deildarinnar og Knattspyrnusambands Englands. Í yfirlýsingu kemur fram að aðilar máls leggja áherslu á að allt verði gert til þess að hægt verði að ljúka mótum þegar óhætt verður að hefja keppni í knattspyrnu á nýjan leik. Þetta verða að teljast góðar fréttir í öllum þeim vondu fréttum sem efst eru á baugi um þessar mundir. 

Að sjálfsögðu fer nú allt eftir útbreiðslu pestarinnar. Ljóst er að mótahald mun dragast fram á sumar en unnið verður að því að ljúka þeim. Heilsa og heill fólks gengur þó fyrir öllu!