Allir miðverðirnir heilir

Þau undur og stórmerki hafa gerst að nú eru allir miðverðir liðsins heilir. Dejan Lovren tók fullan þátt í æfingu liðsins í gær.

Joel Matip meiddist í október og var í fyrsta sinn eftir það í leikmannahópnum í leiknum gegn Manchester United. Lovren tók stöðu hans í vörninni en hann meiddist svo í desember, og þá leysti Joe Gomez hann af hólmi. 

Bæði Lovren og Gomez stóðu sig með prýði en þegar aðeins Gomez og Van Dijk voru heilir var staðan býsna tæp á miðvörðunum. Sem betur fer hafa þeir báðir haldist heilir, og nú er Dejan Lovren farinn að æfa á fullu.

Þetta þýðir meiri breidd og kannski hægt að dreifa álaginu meira á miðvörðunum. Í það minnsta eru þetta afar góðar fréttir fyrir lokaátökin í deildinni.