Harry Wilson lánaður

Harry Wilson var í dag lánaður til Bournemouth. Hann spilar með liðinu allt komandi keppnistímabil. Líklega eru margir stuðningsmenn Liverpool vonsviknir með þessa ákvörðun því Harry spilaði mjög vel á undirbúningstímabilinu og skoraði tvö mörk. 


Harry spilaði í láni hjá Hull City seinni hluta keppnistímabilsins 2017/18 og stóð sig vel. En segja má að hann hafi slegið í gegn á síðustu leiktíð þegar hann var lánsmaður hjá Derby County. Hann var með bestu mönnum liðsins sem komst í umspil um sæti í efstu deild. Kosturinn við lánssamninginn sem gerður var í dag er sá að nú ætti að koma í ljós hvort Harry er nógu góður til að spila í Úrvalsdeildinni. 


Harry Wilson er alinn upp hjá Liverpool og hefur leikið einn leik með aðalliðinu. Hann er búinn að vera einn efnilegasti leikmaður Liverpool síðustu árin.