Af leikmannamálum

Eins og vant er á þessum tíma ársins er mikið rætt um hugsanleg félagaskipti leikmanna. Nokkrir hafa verið orðaðir við Liverpool og þessir helstir. 

Framherjinn Nicolas Pepe sem spilar með Lille hefur mikið verið í umræðunni. Hann þykir magnaður en blaðamenn Liverpool Echo telja að Liverpool hafi ekki hug á að reyna að kaupa hann. 

Bruno Fernandes er lykilmaður á miðjunni hjá Sporting Lissabon. Portúgalski landsliðsmaðurinn hefur verið orðaður við Liverpool og reyndar miklu fleiri félög. Hugsanlega er hann í sigtinu hjá Liverpool. 

Nabil Fekir miðjumaður Lyon var næstum genginn til liðs við Liverpool fyrir ári en ekkert varð úr. Hann er ennþá af og til orðaður við Liverpool en ólíklegt er að hann komi hér eftir. 

En hvað um þá sem gætu farið? Daniel Sturridge og Alberto Moreno fara en ekki er útlit á að margir fleiri fari. 


Reiknað með að Simon Mignolet verði áfram. Forráðamenn Liverpool vilja halda honum og Simon yrði ekki seldur nema gott tilboð kæmi í hann.


Eitthvað hefur verið fjallað um að Dejan Lovren sé í sigtinu hjá einhverjum félögum. AC Milan hefur  verið nefnt til sögunnar. Það sama gildir með hann og Simon að forráðamenn Liverpool vilja hafa hann áfram. 

Við sjáum hvað setur. En hvað sem verður þá er ljóst að forráðamenn Liverpool eru ekkert að flýta sér í þessum málum. Að minnsta kosti virðist ekki svo vera.