Roy Hodgson með met!

Roy Hodgson setti met í fyrradag þegar hann varð elstur manna til að stjórna liði í leik sem framkvæmdastjóri í Úrvalsdeildinni. Þann 23. febrúar mætti Crystal Palace Leicester á útivelli og vann 1:4. Roy var þá 71 árs og 198 daga gamall. Hann er hvergi af baki dottinn og bætir metið jafnt og þétt. 


Allt gekk á afturfótunum þann tíma sem Roy Hodgson var framkvæmdastjóri Liverpool en það var ekki honum að kenna að hann skyldi vera ráðinn. Margt var honum mótdrægt og ekki síst fjárhagsástæður félagsins. En hvað sem má um Roy segja þá vantar ekkert upp á ástríðu hans fyrir knattspyrnu og hann hefur gert margt gott á þjálfaraferlinum sem spannar rúmlega fjóra áratugi. Hann er nú hjá Crystal Palace en það var félagið sem hann hélt með í barnæsku.