Frægur fyrir leik

Sigmar Vilhjálmsson fjölmiðlastjarna og hamborgarakóngur er næstur í röð frægra stuðningsmanna Liverpool til að spá í spilin og svara nokkrum spurningum. Simmi spáir öruggum sigri á Leicester á nýársdag. 

Hvenær byrjaðir þú að halda með Liverpool?
Ég byrjaði að halda uppá Liverpool árið 1982. En þá var ég 5 ára og bróðir minn sem þá var 9 ára var búinn að betrekkja alla veggi með Bruce Grobbelaar, Ian Rush, Graeme Souness, Kenny Dalglish og Ronnie Whelan. Það ár vann Liverpool deildina með 82 stig. Gaman að segja frá því að Watford varð í öðru sæti með 71 stig og Man. Utd. í þriðja með 70 stig. 

Hver er þinn uppáhalds Liverpool leikmaður allra tíma?
Minn uppáhaldsleikmaður Liverpool allra tíma er líklega Steven Gerrard. Sennilega af því að hann er original Liverpool maður. Verst er að hann er orðinn of gamall, því miður. Hann hefði átt skilið að lyfta bikarnum gegn Newcastle síðasta vor. En hann datt víst á móti Chelsea og þar endaði það.

Hver er í mestu uppáhaldi af núverandi leikmönnum liðsins?
Ég verð að segja Philippe Coutinho, hann á mikið inni og hefur samt staðið sig vel. Um leið og hann fær að spila sinn leik, þá mun hann blómstra. Því miður held ég að Gerrard sé of ráðandi á miðjunni og menn líti of mikið til hans. En Coutinho er stóra stjarnan okkar verðandi. 

Ef þú mættir kaupa einn leikmann að eigin vali til Liverpool, hver yrði þá fyrir valinu?
Suarez. Ég myndi vilja fá hann aftur. Með þá leikmenn sem við erum með í dag, þá er Suarez alveg banvænn frammi. Nema að Sturridge verði í stuði þegar hann getur farið að spila. 

Hvernig fer leikurinn gegn Leicester á nýársdag?
Leikurinn gegn Leicester verður sigur okkar. Ég vona að Brendan Rodgers þori að halda Gerrard á bekknum og veðja á að leikstíll okkar gegn Swansea haldi. En sigurinn verður okkar, 3-0.

Í hvaða sæti endar Liverpool í vor?
Liverpool endar í 5. sæti í vor. Við náum góði skriði núna eftir áramót, en það mun ekki duga. Chelsea mun halda forystunni til loka. En ég tek fram að Man. Utd. mun enda í 6. sæti. Þannig að við Liverpool menn getum a.m.k. glaðst yfir einhverju í vor. Haha!