Rickie ætlar að bæta sig

Rickie Lambert hefur ekki náð sér í gang það sem af er leiktíðar. Hann sjálfur er ekki ánægður með hvernig hefur gengið og ætlar að bæta sig. Enski landsliðsframherjinn hafði meðal annars þetta að segja í viðtali við Liverpool Echo. 

 ,,Ég er ekki eins snarpur og ég vildi vera. Það vantar eitthvað upp á eitt og annað. Ég vil koma mér í betra form því allir vita að ég spila ekki alla leiki og ég verð að aðlaga mig að þeirri staðreynd. Ég held ég verði að leggja meira á mig svo ég verði í jafn góðu formi og allir aðrir."

Sumir telja að það hafi reynst Rickie erfitt að koma til Liverpool frá Southampton þar sem allt er minna í sniðum. Rickie er ekki sammála því.   

,,Þetta snýst ekkert um að venjast því að vera leikmaður Liverpool. Ég þarf bara að ná upp snerpu og koma mér í betra form á æfingavellinum og bæta mig."

Allir sjá að Rickie langar mikið til að standa sig hjá Liverpool eftir að hann fékk draum sinn uppfylltan um að spila fyrir hönd félagsins. En er sú staðreynd að ekki gengur vel farin að trufla hann og spilla fyrir?  

,,Það er alls ekki ólíklegt og ég verð að hafa það í huga. Ég má ekki láta þetta setja mig út af laginu. En svona er staðan sem ég er í. Ég hef fulla trú á að ég geti komið mér í gang og byrjað að leggja af mörkum eins og ég veit ég get."

Rickie hefur enn ekki skorað fyrir Liverpool en hann fékk þann mikla heiður að leiða Liverpool sem fyrirliði í Deildarbikarleiknum á móti Southampton. Hann sagði að það hefði komið sér á óvart að Brendan Rodgers skipaði hann fyrirliða. 

,,Þetta kom mér á óvart. Framkvæmdastjórinn tók mig tali og sagði mér að ég ætti að vera fyrirliði. Það var mér mikill heiður að fá að leiða liðið. Var þetta draumastund fyrir strák héðan af svæðinu? Jú sannarlega. En fyrir utan það allt þá var þetta undarlegur leikur. Ég hef aldrei áður séð svona langa vítspyrnukeppni."

Rickie Lambert hefur enn ekki skorað fyrir Liverpool en hann hefur raðað inn mörkum fyrir Southampton síðustu árin. Allir stuðningsmenn Liverpool vona að Rickie fari að skora og það skiptir miklu máli að hann fari að skora því Luis Suarez er á braut og nú verða aðrir að leggja mörk af mörkum.

Kannski nær Rickie að brjóta ísinn á móti Everton á laugardaginn. Það kæmi sér sérlega vel að Rickie opnaði markareikning sinn þá!