Moses mætir uppeldisfélagi sínu í dag

Liverpool fær Crystal Palace í heimsókn á Anfield í dag, en það var einmitt hjá því félagi sem Victor Moses hóf knattspyrnuferil sinn.

Það var njósnari á vegum Crystal Palace sem uppgötvaði Victor Moses á sínum tíma, en Moses bjó þá í grennd við Selhurst Park heimavöll Suður-Lundúnaliðsins.

Victor lék 69 leiki með Crystal Palace og skoraði í þeim 11 mörk, áður en hann hélt á vit nýrra ævintýra. 

„Fótboltinn er einfaldlega þannig að þér er ekkert endilega ætlað að vera lengi á sama staðnum. En mér leið mjög vel hjá Crystal Palace. Það var vel hugsað um mig þar og mér þykir mjög vænt um þann tíma sem ég var hjá liðinu. Þetta er flottur klúbbur", segir Moses í viðtali við Liverpoolfc.com.

„Núna er ég hjá Liverpool og mér líður vel hér. Við höfum farið vel af stað og vonumst til þess að geta bætt stöðu okkar enn frekar. Að vísu töpuðum við síðasta heimaleik, sem var ekki nógu gott. Við ætlum ekki að tapa tveimur heimaleikjum í röð. Það er klárt!"

„Ég held að við séum nægilega gott lið til þess að vinna hvaða leik sem er, en það má aldrei slaka á í þessari deild. Staða okkar er góð eins og er, það sést á töflunni að við erum að standa okkur ágætlega."

„Það er frábært að spila fyrir Liverpool og alveg einstök upplifun að spila á Anfield. Stuðningsmennirnir eru alveg magnaðir. Vonandi náum við að byggja upp gott heimavallarform. Það er gríðarlega mikilvægt og stuðningsmennirnir eiga það skilið."