Daniel og Martin leikfærir

Þeir Daniel Sturridge og Martin Skrtel misstu af sigurleik Liverpool í Wigan um síðustu helgi. En nú eru þeir leikfærir og geta þess vegna tekið þátt í stórleik Liverpool og Tottenham á sunnudaginn.
 
Menn hafa kannski einhverjar áhyggjur af heilsufari Daniel en hann var töluvert meiddur hjá Chelsea áður en hann kom til Liverpool. Meiðsli á læri munu hafa komið í veg fyrir að hann gat farið til Wigan.

Hann varð líka að draga sig út úr enska landsliðinu í síðasta mánuði þegar það mætti Brasilíu. Það er þó vonandi að Daniel verði ekki mikið frá vegna meiðsla því hann hefur byrjað feril sinn hjá Liverpool eins og best verður á kosið.

Martin er aftur leikfær en það er svo sem ólíklegt að hann komi inn í byrjunarlið Liverpool því Jamie Carragher er búinn að taka stöðuna af honum. Það er þó gott að hafa Slóvakann tilbúinn í slaginn.