Danny Wilson lánaður

Skoski varnarmaðurinn Danny Wilson hefur verið lánaður til skoska liðsins Hearts til loka tímabilsins.  Þetta þýðir að dagar hans sem leikmanns Liverpool eru taldir. Samningur Wilson rennur út í sumar og félagið hefur ekki boðið honum nýjan samning sem þýðir að hann er laus allra mála þegar núverandi samningur rennur út.



Danny, sem hefur leikið fimm landsleiki fyrir Skota og skorað eitt mark, kostaði félagið tvær milljónir punda þegar hann var keyptur frá Glasgow Rangers sumarið 2010 en hann hefur átt erfitt með að sanna sig.  Hann hefur spilað níu leiki alls og síðast var það gegn Brighton í Deildarbikarnum í september 2011.

Hann var lánaður til Blackpool á síðasta tímabili og ætlaði að sanna sig fyrir nýjum stjóra þegar hann sneri til baka úr því láni.  Hins vegar hefur Brendan Rodgers ekki hrifist af frammistöðu hans á æfingum og komst hann aðeins þrisvar sinnum á bekkinn hjá Rodgers áður en hann var svo lánaður til Bristol City í tvo mánuði fyrr í vetur. Þar spilaði hann aðeins einn leik og hefur hann nú snúið aftur til heimalandsins í von um að fá að spila reglulega.  

Danny gæti spilað sinn fyrsta leik fyrir Hearts í dag er þeir mæta Celtic.  Standi hann sig vel mun hann að öllum líkindum fá samningsboð frá Hearts og ganga til liðs við þá að fullu. Danny lék með varaliði Liverpool á mánudaginn þegar það lagði Southampton að velli 1:0. Hann er þriðji leikmaðurinn sem yfirgefur félagið í janúarglugganum á eftir þeim Joe Cole og Nuri Sahin.