Liverpool spilar alltaf vel á móti okkur

Roberto Di Matteo stjóri Chelsea segir að Liverpool spili alltaf vel þegar liðið mæti Chelsea. Engu máli skiptir hvar liðin standi í deildinni.

Liverpool hefur gengið býsna vel með Chelsea á undanförnum, sérstaklega ef tillit er tekið til góðs gengis Lundúnaliðsins í flestum ef ekki öllum keppnum síðustu misserin. Á síðustu leiktíð sigraði Liverpool til að mynda 3 af 4 viðureignum liðanna. Eina tapið kom reyndar í leiknum sem skipti hvað mestu máli; FA-bikarúrslitunum á Wembley.

„Liverpool er jójó lið. Þeir spila alltaf vel á móti okkur og það er mjög erfitt að mæta þeim", segir Di Matteo í viðtali við London24.com.

„Liverpool hefur marga góða leikmenn innanborðs og einhvernveginn hittist það ansi oft þannig á að þessir menn spila sinn besta leik á tímabilinu þegar við mætum þeim!. Að sama skapi hefur leikmönnum Liverpool gengið mjög vel að halda okkar bestu leikmönnum niðri, þannig að þeir hafa oft ekki náð að sýna sitt rétta andlit í leikjum við Liverpool. Hvernig sem á því stendur."

„Luis Suarez er frábær leikmaður og hefur skorað grimmt í haust. Það er virkilega erfitt fyrir varnarmenn að eiga við hann. Liverpool hefur ekki marga aðra hættulega leikmenn fram á við, en það er slatti af ungum og efnilegum strákum að stimpla sig inn hjá þeim. Síðan eru þarna líka reyndir og góðir leikmenn eins og Glen Johnson, Daniel Agger, Martin Skrtel og Steven Gerrard."

„En það gengur vel hjá okkur í augnablikinu. Andinn í liðinu er góður og menn eru fullir sjálfstrausts. Vonandi tekst okkur að snúa á þá rauðklæddu á sunnudaginn. Við munum allavega reyna að spila eins vel og við getum, enda þurfum við að gera það til þess að eiga möguleika á góðum úrslitum."