Mikilvægur leikur í kvöld

Það er óhætt að segja að Evrópudeildarleikur Liverpool og rússneska liðsins Anzhi á Anfield í kvöld sé mjög mikilvægur. Liverpool er í vandræðum eftir 2:3 tap í síðasta Evrópuleik fyrir Udinese og það á heimavelli. Þrjú stig er uppskera eftir tvo leiki og Liverpool á bæði eftir að spila á Ítaliu við Udinese og í Rússlandi við mótherja kvöldsins.

Það er stór spurning hverja Brendan Rodgers veldur til leiks í kvöld því að á sunnudaginn mætir Liverpool Everton á Goodison Park og sá leikur hefur auðvitað gríðarlega mikla þýðingu hvernig sem á hann er litið. Mun Brendan til dæmis leggja í að tefla þeim Steven Gerrard og Luis Suarez fram? Luis er auðvitað eini sóknarmaðurinn með einhverja reynslu og hann verður að vera tiltækur á sunnudaginn. Jose Reina leikur ekki í kvöld en hann er ekki búinn að ná sér af meiðslum. Brad Jones mun verja markið og ekki ástæða til að hafa áhyggjur af því. 

En það verður áhugavert að sjá hvernig Brendan spilar úr mannskap sínum því Liverpool þarf helst sigur í kvöld ætli liðið sér upp úr riðlakeppninni. En rimman við Everton á sunnudaginn verður honum líklega ofarlega í huga þegar hann velur liðið. 

Meðfylgjandi liðsmynd var tekinn fyrir Evrópuleik Liverpool í Sviss á móti Young Boys. Þá voru ungir menn ræstir út og ekki er ólíklegt að sama verði upp á teningnum í kvöld.