Hápunktur ársins 2011 - Númer 3

Á dögunum könnuðum við hvaða atburður nýliðins árs lesendum Liverpool.is þótti merkilegastur. Við förum nú yfir niðurstöðurnar. Þriðji markverðasti atburðurinn reyndist reyndar þrír mismunandi atburðir.

Í fyrsta lagi varð Luis Suarez fyrsti leikmaður Liverpool til að verða Suður Ameríkumeistari í knattspyrnu. Hann lék lykilhlutverk í mögnuðu meistaraliði Úrúgvæ og skoraði meðal annars í úrslitaleiknum þegar Úrúgvæ vann Pargvæ 3:0. Hann var svo valinn besti leikmaður keppninnar! 

Luis kom líka við í öðrum viðburði sem fékk jafn mikið fylgi en það var þegar hann og Andy Carroll voru keyptir til Liverpool í lok janúar. Kenny Dalglish og ráðgjafar hans brugðust hart við og keyptu þá tvo þegar Fernando Torres ákvað að fara til Chelsea. 

 

Þriðji viðburðurinn voru kaup Liverpool á sjö nýjum leikmönnum á liðnu sumri. Nokkir fóru á braut og endurnýjunin var mikil. Hún var ekki bara mikil heldur líka mjög nauðsynleg.