Stöndum þétt saman!

Jose Reina segir að leikmenn Liverpool standi þétt saman að baki Luis Suarez. Hann segist sannfærður um að Luis sé ekki haldinn kynþáttafordómum. Hann sagði meðal annars þetta í viðtali við Liverpoolfc.tv.

,,Við stöndum allir þétt að baki Luis. Ég er 100% viss um að Luis er ekki kynþáttahatari. Þær ásakanir sem á hann hafa verið bornar eru ekki sanngjarnar. Við höfum sýnt stuðning okkar við Luis og við viljum að hann og allir viti að við stöndum með liðsfélaga okkar. Hann á það skilið. Hann er mjög fínn náungi. Hann hefur verið krossfestur af sumum og það er einfaldlega ekki sanngjarnt."
 
Stuðningur leikmanna Liverpool við Luis hefur verið nokkuð umdeildur í knattspyrnuheiminum og hafa sumir gagnrýnt þann opinbera stuðning sem leikmenn sýndu í Wigan. En leikmenn Liverpool tóku þá ákvörðun að sýna samstöðu með félaga sínum og þeir standa og falla með þeirri ákvörðun sinni.