Það styttist í lok ferils Jamie

Það segir sér sjálft að það styttist í að Jamie Carragher hætti knattspynuiðkun. Hann sjálfur er farinn að átta sig á því að það sé farið að styttast í glæsilegum ferli sínum. Hann segir að Kenny Dalglish og þjálfaralið Liverpool hafi mest um það að segja hvenær hann hætti. Hann hafði þetta að segja í viðtali í dag.

,,Spyrjiði Kenny. Hann velur liðið. Ég á von á því að þjálfaraliðið hafi mest um það að segja. Maður vill fá sem mest út úr ferli sínum og spila eins lengi og mögulegt er. Líklega kemur að því á næstu tólf til átján mánuðum. Kannski eru tvö ár í það. Ég ræð þessu ekki sjálfur. Fólkið í kringum mig, starfsliðið og framkvæmdastjórinn ákveða þetta."

Það hefur lengi verið talið að Jamie sé efni í þjálfara og síðar knattspyrnustjóra og ekki vantar áhuga hjá honum sjálfum á því að fara þá leið eftir að ferlinum lýkur. Hann staðfesti áhuga sinn í þessu viðtali og segist vera farinn að taka fyrstu skrefin í að læra þjálfun. Margir telja að Jamie muni einmitt fá starf við þjálfun hjá Liverpool þegar hann hættir sem leikmaður.

Jamie lék sinn fyrsta leik með Liverpol í janúar 1997. Hann er nú búinn að spila 676 leiki og er annar leikjahæsti leikmaður í sögu Liverpool. Það styttist í lok ferils þessa magnaða kappa en hann er ekki búinn að segja sitt síðasta orð inni á knattspyrnuvellinum. Hann átti til dæmis stórleik í vörninni þegar Liverpool vann Everton á Goodison Park um síðustu helgi.