Joe Cole á förum?

Vefmiðlar á Englandi flytja látlaust fréttir af því að Joe Cole muni yfirgefa Liverpool og það fyrr en seinna. Talið er að hann fari í höfuðstaðinn. Þar munu Queens Park Rangers og jafnvel Tottenham Hotspur vera líkleg til að næla í enska landsliðsmanninn.

Joe Cole kom til Liverpool fyrir einu ári en hann hefur langt frá því staðið undir væntingum. Flest hefur gengið honum í móti frá því hann kom til Liverpool. Rautt spjald í fyrsta deildarleiknum var ekki góðs viti og svo tóku regluleg meiðsli við.

Joe mætti mjög sterkur til leiks á undirbúningstímabilinu. Hann æfði reyndar á fullu í allt sumar til að vera sem best undirbúinn þegar reglulegar æfingar hófust. Honum gekk samt ekki vel í þeim æfingaleikjum sem hann tók þátt í og hann var ekki valinn í leikmannahópa Liverpool fyrir þá tvo deildarleiki sem eru búnir. Brottför er því ekki ólíkleg.