Eccleston lánaður

Nathan Eccleston hefur verið lánaður til Charlton Athletic til loka tímabilsins. Hann hefur fengið tækifæri með aðalliðinu á tímabilinu og var í fyrsta sinn í byrjunarliði í Evrópuleiknum gegn Utrecht í desember. Alls hefur hann leikið níu leiki með Liverpool.  

Hann er byrjaður að æfa með Charlton en hans fyrsta æfing var í gær. Gengið var frá pappírunum í dag og vonast Eccleston til að spila sinn fyrsta leik á laugardaginn gegn Sheffield Wednesday.  Eccleston var á láni hjá Huddersfield á síðasta tímabili.  Charlton menn eru hæstánægðir með að hafa klófest kappann á lánssamningi.

Stjórnarformaður félagsins, Michael Slater sagði:  ,,Nokkur félög vildu fá Nathan á láni í félagaskiptaglugganum og flest félögin voru deild ofar en við. Við þurftum því að flýta okkur í þessu máli og erum mjög ánægðir með að hafa fengið hann til okkar."

,,Hann er mjög hátt skrifaður og verður frábær viðbót við leikmannahóp okkar."

Charlton er sem stendur í League One en það er gamla þriðja deildin. Þeir eru í sjötta sæti deildarinnar og í hörku baráttu um að komast upp um deild eða að minnsta kosti í umspil í vor.