Kaupin á Konchesky staðfest

Opinber heimasíða félagsins staðfesti nú rétt í þessu kaupin á vinstri bakverðinum Paul Konchesky frá Fulham.

Konchesky, sem er 29 ára, hefur skrifað undir fjögurra ára samning eftir að hafa staðist læknisskoðun hjá félaginu.

Ungliðarnir Lauri Dalla Valle og Alex Kacaniklic fóru sem hluti af kaupverðinu til Fulham í staðinn.  Verður að segjast að það komi nokkuð á óvart þar sem Dalla Valle er talinn vera þónokkuð efni.

Einnig var tilkynnt í dag að tveir ungir leikmenn hafi verið fengnir til félagsins.  Þetta eru þeir Suso (fullt nafn Jesus Joaquin Fernandez Saenz De La Torre) og Adam Hajdu.  Suso hefur verið að spila mjög vel með varaliðinu undanfarið en Hajdu kemur sem hluti af samstarfssamningi Liverpool og MTK Budapest og eru vistaskiptin tímabundin til 30. júní 2011.