Emiliano fer ekki til Fiorentina

Emiliano Insua mun ekki spila með Fiorentina á næsta keppnistímabili. Talsmaður ítalska félagsins staðfesti þetta í fjölmiðlum í gær. Í máli hans kom fram að Liverpool og Fiorentina hefðu verið búin að komast að samkomulagi um kaup og sölu á leikmanninum.

Samkomulag náðist á hinn bóginn ekki við Emiliano sjálfan um launamál hans. Nokkuð undarlegt verður að teljast að Emiliano skyldi ekki gefa eftir kaupkröfur sínar hafi hann haft einhvern hug á að spila með ítalska liðinu. Þetta er því allt nokkuð dularfullt mál.  

Emiliano Insua er því ennþá leikmaður Liverpool og hann kom óvænt inn í lið Liverpool um helgina. Ekki er gott að segja hvort hann verður það lengi því hann var jú til sölu í síðasta mánuði. En hann verður að minnsta kosti tiltækur í lið Liverpool í nánustu framtíð.
 
Salan fyrirhugaða á Emiliano var nokkuð umdeild meðal stuðningsmanna Liverpool. Sumir töldu ekki rétt að selja Argentínumanninn og nú geta þeir sem vildu ekki selja hann tekið gleði sína.