Forsíða

Frétt

22.06.2010 22:06 | Sf. Gutt

Af HM

Lokaumferð riðlakeppninnar hófst í dag. Nú ræðst hvaða leikmenn Liverpool verða áfram í Suður Afríku og hverjir fara í sumarfrí.
 
Maxi Rodriguez var í byrjunarliði Argentínumanna sem mættu Grikkjum. Argentínumenn áttu sæti víst í sextán liða úrslitum og því var Javier Mascherano hvíldur. Sotirios Kyrgiakos var í vörn Grikkja sem áttu möguleika á áframhaldi með sigri eða jafntefli. 

Argentínumenn sóttu frá upphafi til enda og unnu að lokum 2:0. Þeir Martin Demichelis og nafni hans Palermo skoruðu undir lok leiksins. Argentínumenn unnu B riðil og Suður Kórea fylgir þeim áfram eftir 2:2 jafntefli við Nígeríu.

Maxi stóð sig vel og einu sinni nærri því að skora en markmaður Grikkja varði vel frá honum. Soto stóð vaktina vel í vörn Grikkja og endaði leikinn sem fyrirliði. Hann er þó kominn í sumarfrí eftir góða framgöngu í þeim tveimur leikjum sem hann spilaði.

Hér eru myndir úr leiknum af Liverpoolfc.tv.

Fyrr í dag réðust úrslit í A riðli og fóru Úrúgvæ og Mexíkó áfram. Tveir fyrrum leikmenn Liverpool, Alou Diarra og Djibril Cisse, voru í mikið breyttu byrjunarliði Frakka sem töpuðu 2:1 fyrir Suður Afríku. Alou, sem reyndar aldrei lék með Liverpool, var fyrirliði Frakka. Hann leikur nú með Bordeaux.
Til baka

Fréttir

Samstarfsaðilar

  • Úrilla górillan
  • Jói Útherji knattspyrnuverslun
  • VITA
  • Advania
  • Ölgerðin