Guðlaugi hrósað!

Guðlaugur Victor Pálsson kom til Liverpool fyrir rúmu ár. Hann komst strax í varalið Liverpool. Á síðasta keppnistímabili lék hann oftast aftarlega á miðjunni og stóð hann sig vel í þeirri stöðu. 

Núna hefur Guðlaugur fengið annað hlutverk. Í síðustu leikjum hefur hann leikið sem miðvörður við hliðina á Daniel Ayala. Landa okkar hefur gengið vel í þessari nýju stöðu og fengið mikið hrós fyrir að skila henni vel. 

Í síðustu viku átti hann mjög góðan leik við hliðina á Daniel þegar Liverpool vann Wigan 2:0. John McMahon þjálfari varaliðsins sagði þetta um Guðlaug eftir leikinn. ,,Hann spilaði mjög vel í dag. Hann er nýbyrjaður að spila þessa stöðu og á margt eftir ólært. Ég vona að hann eigi eftir að halda áfram að bæta sig í stöðunni."

David Fairclough, fyrrum leikmaður Liverpool, fylgist jafnan með varaliðsleikjunum á sjónvarpsstöð félagsins. Hann hrósaði Guðlaugi í lýsingu á leik Liverpool og Hull núna fyrr í vikunni. Hann sagði Guðlaug vera sterkan leikmann sem hefði verið að spila vel sem varnarmaður.
 
Guðlaugur var ekki alltaf í byrjunarliði varaliðs Liverpool framan af þessu keppnistímabili en núna er hann orðinn fastamaður á nýjan leik og það verður fróðlegt að sjá hvernig honum vegnar til vorsins.