Fréttir af Gerrard og Torres

Margir bíða eftir fréttum af þeim Steven Gerrard og Fernando Torres en báðir meiddust gegn Reading þann 13. janúar. 

Í fyrstu var talið að Gerrard yrði frá í tvær vikur eftir að hann tognaði í nára.  Endurhæfing hans hefur hinsvegar gengið mjög vel og er hann jafnvel talið að hann geti byrjað æfingar að fullu nú um helgina, sem er nokkuð á undan áætlun.  Benítez og læknaliðið mun þó fylgjast með honum og mun hann ekki verða látinn byrja æfa of fljótt.

Næsti leikur er á þriðjudaginn gegn Úlfunum úti og næsta víst er að Gerrard mun ekki taka þátt í þeim leik.  Næsti leikur þar á eftir er heimaleikur gegn Bolton laugardaginn 30. janúar og þar gæti Gerrard allt eins verið klár í slaginn.

Benítez færði einnig fréttir af því að endurhæfing Torres gengi vel eftir að hann gekkst undir aðgerð á hné í Barcelona á Spáni fyrir tæpri viku síðan.  Meiðsli hafa heldur betur sett strik í reikninginn hjá Torres á tímabilinu og í nóvember var jafnvel talið að hann þyrfti að gangast undir aðgerð vegna meiðsla í nára.

Margir undruðust því af hverju ekki var ákveðið að gera tvær aðgerðir á Torres í einu en Benítez greindi frá því að einfaldlega hefði ekki verið þörf á því að gera neitt varðandi nárameiðslin.  Sú vinna sem Torres lagði á sig á æfingasvæðinu dag hvern gerði það að verkum að hann náði sér góðum af meiðslunum.

,,Vandamálið var í hnénu á honum og núna er allt í lagi," sagði Benítez.  ,,Fernando ræddi við lækninn og staðan var betri en þeir bjuggust við.  Hann verður ennþá frá í fimm til sex vikur en allt lítur vel út.  Hvers vegna fór hann ekki í aðgerð á nára ?  Einfaldlega vegna þess að læknirinn sagði að ekki væri þörf á því."