4 efstu sætin gætu orðið öðruvísi

Jamie Carragher segir að efstu fjögur sætin í ensku Úrvalsdeildinni gætu orðið öðruvísi en venjulega á þessu tímabili.  Liverpool, Manchester United, Chelsea og Arsenal hafa einokað þessi sæti undanfarin ár.

Carragher telur hinsvegar að þetta gæti breyst á þessu tímabili.

,,Ég held að Manchester City séu mjög sterkir - Tottenham líka.  Aston Villa og Everton gætu verið líkleg einnig, þannig að ég held að þetta verði aðeins meira spennandi á þessu tímabili," sagði varafyrirliðinn.

,,Efstu fjögur sætin eru klárlega opin fyrir hverjum sem er en við viljum tryggja að við séum í baráttunni.  Ég held að þar sem fleiri lið séu að bætast í hópinn megi gera ráð fyrir því að þau taki stig af hinum stóru liðunum líka."

Carragher var spurður að því hvort hann teldi að Manchester City gætu haldið áfram góðri spilamennsku sinni út tímabilið og sagði hann:  ,,Já.  Þeir eru með marga stórkostlega leikmenn, heimsklassaleikmenn og ég er viss um að þeir kaupi fleiri leikmenn í janúar, það er því ljóst að þeir munu gera harða atlögu að titlinum."