Forráðmenn Liverpool ákveðnir í að næla í Guðlaug Victor

Forráðamenn Liverpool voru greinilega ákveðnir í því að næla í Guðlaug Victor Pálsson. Kaup hans til Liverpool, sem gengið var frá núna fyrir helgina, áttu sér nokkurn aðdraganda.

Guðlaugur var á reynslu hjá Liverpool í haust og í kjölfarið á því gerði Liverpool AGF Arhus kauptilboð. Forráðamenn danska liðsins höfnuðu tilboðinu enda var ætlunin þar á bæ að láta Guðlaug fara að spila með aðalliðinu á þessu ári. Í herbúðum Liverpool var neitunin ekki tekin gild og annað tilboð sett fram. Því var tekið núna fyrir jólin og Guðlaugur varð þar með leikmaður Liverpool!

Neitun danska félagsins á fyrsta tilboðinu og annað tilboð Liverpool virðist sýna að Guðlaugur Victor hafi unnið sig í mikið álit hjá báðum félögum. Guðlaugur er líka talinn mikið efni þrátt fyrir að hafa ekki verið mikið í fréttum fyrir það í fjölmiðlum á Íslandi.

Margt áhugavert kom fram í viðtali við Guðlaug sem var sent út á Bylgjunni núna í morgun. Hermann Gunnarsson fékk Guðlaug í viðtal og það má hlusta á viðtalið hérna á vefsíðu Bylgjunnar.