Af Ólympíuleikunum

Ryan Babel og Javier Mascherano munu mætast í 8-liða úrslitum í knattspyrnukeppni Ólympíuleikanna þegar Hollendingar og Argentínumenn leiða saman hesta sína.  Lucas og félagar í Brasilíu mæta Kamerún.

Ryan Babel spilaði allan leikinn með Hollendingum í 1-0 sigri á Japan sem þýddi að þeir hollensku tryggðu sér annað sætið í sínum riðli.  Þeir mæta því Argentínumönnum í 8-liða úrslitum þar sem Argentínumennirnir unnu sinn riðil.

Javier Mascherano spilaði allan leikinn í 2-0 sigri Argentínumanna á Serbíu og eins og áður sagði unnu þeir sinn riðil. Javier, sem var fyrirliði, spilaði óvenjulega stöðu í leiknum. Hann lék sem miðvörður og komst bara vel frá því hlutverki.

Lucas og félagar í Brasilíska landsliðinu unnu heimamenn í Kína 3-0 og tryggðu sér þar með sigur í C-riðli.  Þeir mæta Kamerún á laugardaginn þegar 8-liða úrslitin hefjast.  Á meðfylgjandi mynd má sjá Lucas í baráttunni um boltann við leikmenn Kína.