Ungur Hollendingur keyptur

Í gær var tilkynnt um að Liverpool hefði gert samning við Hollendinginn unga Vincent Lucas Weijl. Liverpool fékk hann frá hollenska liðinu AZ Alkmar en hann er alinn upp hjá því félagi. Hann er seytján ára gamall. Vincent, sem er sóknarmaður, samdi við Liverpool til þriggja ára.

Vincent er þriðji ungliðinn sem Liverpool fær til liðs við sig það sem af er sumri. Daninn Nikola Saric var keyptur frá Herfölge og Ungverjinn Zsolt Pölöske kom sem lánsmaður frá MTK. Liverpool hefur fengið fjölda ungra og efnilegra leikmanna úr öllum heimshornum til sín síðustu tvö til þrjú árin. Markmiðið er að næla í einhverjar framtíðarstjörnur. Það ætti svo að koma í ljós á næstu árum hvort einhverjir af þessum strákum ná því að verða fastamenn í aðalliðinu. 

Vincent Lucas Weijl er fjórði Hollendingurinn sem er nú á mála hjá Liverpool. Hinir eru Dirk Kuyt, Ryan Babel og Jordy Brouwer sem enn hefur ekki spilað í aðalliðinu.