Varaliðið kemst í enn einn úrslitaleikinn

Varalið Liverpool komst í kvöld í enn einn úrslitaleikinn. Liðið tryggði sér þá sæti í úrslitaleik Lancashire County bikarkeppninnar með 3:0 sigri á Accrington Stanley. Leikið var á heimavelli Accrington. Krisztian Nemeth, Daniel Pacheco og Andras Simon skoruðu mörkin. Ástralinn Dean Bouzanis átti stóran þátt í sigrinum en hann varði vítaspyrnu þegar staðan var 1:0. Sigurinn kostaði þó sitt og þrír leikmenn Liverpool meiddust í leiknum. Jay Spearing, Ronald Huth og Ryan Flynn meiddust og ekki er víst hvort þeir verða orðnir leikfærir þegar Liverpool spilar við Aston Villa um landsmeistaratitil varaliða í næstu viku.

Liverpool: Bouzanis, Darby, Irwin, San Jose, Huth (Insua 24. mín.), Kelly, Lindfield, Spearing (Pacheco 33. mín.), Brouwer (Nemeth 77. mín.), Simon og Flynn.

Liverpool mætir Manchester United í úrslitaleiknum. Ekki hefur enn verið ákveðið hvenær leikurinn fer fram. Liverpool tapaði óvænt fyrir Marine í úrslitaleik Bikarkeppni Liverpool borgar á dögunum en vonandi næst þessi bikar í hús.