Benítez um slæmt gengi á heimavelli

Rafael Benítez segist ekki geta útskýrt hvers vegna svo illa hefur gengið á heimavelli í vetur. Með jafnteflinu gegn Wigan eru þau orðin fleiri á heimavelli en sigrarnir, þó að vissulega hafi það sitt að segja að þrjú efstu liðin hafa nú þegar leikið á Anfield. Það sem er kannski meira svekkjandi er að liðin í öðru, þriðja og fjórða sæti í deildinni nú, þ.e. Man. Utd., Chelsea og Man. City, hafa öll tapað fleiri leikjum en Liverpool.

Benítez segir að það sem helst valdi því að Liverpool er nú tólf stigum á eftir Arsenal sé að í mörgum leikjum hafi gengið illa að nýta færin. "Það er erfitt að útskýra hvers vegna okkur gengur ekki vel á heimavelli. Við stjórnum leikjum, við sendum boltann vel á milli okkar og stjórnum nánast öllu. En okkur er refsað fyrir ein mistök.

Það er engin þörf á því að greina leikina fjóra yfir hátíðirnar. Við hefðum verðskuldað sigur gegn Manchester City og Wigan og unnum Portsmouth og Derby. En við töpuðum fjórum stigum í þessum leik og því hefur bilið breikkað. Það hefur ekkert upp á sig að gagnrýna frammistöðuna mikið. Við vitum að við vorum mun betra liðið gegn City og Wigan en við vitum við verðum að vinna leiki, svo einfalt er það."