Brotist inn til Dirk Kuyt

Dirk Kuyt varð fyrir skömmu fyrir heldur óskemmtilegri reynslu þegar brotist var inn á heimili hans. Hann er sjötti leikmaður Liverpool sem lendir í þessu á tæpum tveimur árum.

Brotist var inn á heimili Kuyt í Woolton, sem er úthverfi í Liverpool, meðan hann var á ferð með hollenska landsliðinu. Ekki hefur fengist staðfest hversu miklu var stolið þaðan.

Jose Reina markvörður Liverpool fékk innbrotsþjófa inn til sín fyrr á þessu ári, nánar tiltekið meðan á leik Liverpool og Chelsea í undanúrslitum meistaradeildarinnar stóð. Hann varð frekar illa úti því töluverðum verðmætum var stolið frá heimili hans, sem einnig er í Woolton, meðal annars hljómtækjum, skjölum og skartgripum. Auk þess var bíllinn var tekinn og hann fannst skömmu seinna brunninn til kaldra kola.

Á síðasta ári urðu Jerzy Dudek, Peter Crouch, Daniel Agger og Florent Sinama-Pongolle allir fyrir því að brotist var inn til þeirra.