Sorgarfréttir

Mikil sorg ríkir á Liverpool svæðinu eftir að þrjár ungar stúlkur létust eftir hrottalega hnífsárás 17 ára pilts í fyrradag. Harmleikurinn átti sér stað í bænum Southport sem er rétt fyrir norðan Liverpool en tilheyrir Liverpool svæðinu.

Stúlkurnar hétu Bebe King sex ára, Elsie Stancomb sjö ára og Alice da Silva Aguiar en hún var níu ára. Nokkrir slösuðust í árásinni en eru úr lífshættu. 

Bæði Liverpool og Everton gáfu út yfirlýsingar þar sem félögin vottuðu öllum tengdum harmleiknum samúð. Phil Thompson og Robbie Fowler lögðu blómsveig frá Liverpool Football Club á svæði í Southport þar sem fólk hafði lagt blóm til minningar um litlu stúlkunnar.

Liverpool klúbburinn á Íslandi vottar öllum sem eiga um sárt að binda vegna þessa harmleiks samúð.