Aðalfundur Liverpoolklúbbsins

Aðalfundur Liverpoolklúbbsins var haldinn á Players á fimmtudaginn var, 17. maí. Þar flutti formaður klúbbsins, Jón Óli Ólafsson, skýrslu stjórnar og fór yfir viðburðarríkt starfsár í sögu klúbbsins. Þá voru reikningar klúbbsins bornir upp og samþykktir.

Nokkrar breytingar urðu á stjórn félagsins á fundinum. Kosið var um þrjá stjórnarmenn til tveggja ára auk þess sem kjósa þurfti fjórða stjórnarmanninn til eins árs þar sem einn hætti störfum á starfsárinu. Voru Hallgrímur Indriðason, Benedikt Jón Sigmundsson og Bragi Brynjarsson kjörnir til tveggja ára og Arngrímur Baldursson til eins árs. Þá voru kjörnir í varastjórn til eins árs Guðmundur Magnússon og Guðmundur Hreiðarsson. Auk þeirra sitja nú í stjórn klúbbsins Jón Óli Ólafsson formaður, Markús Einarsson og Sigurður Reynisson.

Jósep Svanur Jóhannesson hætti nú í stjórn klúbbsins en þar hefur hann setið nánast óslitið frá árinu 1999. Er honum hér með færðar bestu þakkir fyrir frábært starf í þágu klúbbsins.

Á fundinum var ákveðið að stofna YNWA-styrktarsjóð, sem er ætlað að styrkja gott málefni í nafni Liverpoolklúbbsins. Nánari útfærsla á sjóðnum verður ákveðin síðar.