| Grétar Magnússon

Spáð í spilin

Seinni leikurinn gegn RB Leipzig í 16-liða úrslitum Meistaradeildar fer fram í kvöld klukkan 20:00.

Varla þarf að upplýsa neinn um það að leikurinn fer fram á sama velli og fyrri leikurinn, Puskas leikvanginum í Búdapest í Ungverjalandi. Þetta telst þó vera heimaleikur okkar manna og 0-2 forysta eftir fyrri leikinn er ágætt veganesti en stóra spurningin er auðvitað sú hvort það dugar til ? Það liggur við að maður fagni því að leikurinn fari ekki fram á Anfield enda virðast okkar menn vera gersamlega gerilsneyddir allri góðri spilamennsku og heppni á Anfield þessa dagana. Gengi liðanna hefur verið ansi ólíkt síðan liðin mættust síðast. Bæði lið hafa spilað fjóra leiki í millitíðinni, okkar menn hafa tapað þrem og unnið einn á meðan Leipzig hafa unnið alla fjóra leikina með markatölunni 11-2 (þrír deildarleikir og einn bikarleikur).

Bæði lið glíma við meiðslavandræði, byrjum á okkar mönnum (sagan endalausa). Roberto Firmino verður líklega ekki með en hann á við hnémeiðsli að stríða sem héldu honum einnig frá leiknum gegn Fulham um síðustu helgi. Hann bætist því á listann með Henderson, van Dijk, Gomez og Matip. James Milner var ekki sjáanlegur á æfingum fyrir leik og því má fastlega búast við því að hann byrji ekki líkt og síðasta sunnudag. Ozan Kabak hefur hafið æfingar að nýju og hlýtur að byrja í vörninni og þá reikna ég með að þeir Fabinho, Alexander-Arnold, Mané og Thiago byrji einnig í kvöld eftir að hafa sest á bekkinn um helgina. Hjá þýska liðinu verður bakvörðurinn Angelino ekki með ásamt Konrad Laimer og Dominik Szoboszlai, þá eru þeir Marcel Sabitzer og Willi Orban eitthvað smávægilega meiddir og ekki alveg víst með þá en þó er líklegt að þeir hristi sig í gang fyrir svona mikilvægan leik. Svíinn Emil Forsberg mætir hinsvegar til leiks og eru það góðar fréttir fyrir Leipzig en hann er mikilvægur hlekkur á miðjunni og í sóknarspili þeirra, hann var ekki með í fyrri leiknum.

Maður vonar að önnur keppni gefi tilefni til bjartsýni hvað Liverpool varðar en liðið sýndi að mestu sitt rétta andlit í fyrri leiknum. Tvö mörk skoruð, markinu haldið hreinu og spilamennskan heilt yfir mjög góð með hápressu og að sama skapi náðist að spila út úr hápressu Leipzig manna. Þjóðverjarnir hljóta samt að sjá hversu brothættir leikmenn Liverpool eru þegar þeir lenda undir og leggja væntanlega mikla áherslu á að skora fyrsta mark leiksins. Það getur klárlega allt gerst og það er ekki oft sem maður fer hálf svartsýnn inn í "heimaleik" með 2-0 forystu eftir fyrri leikinn. Það er svo sannarlega ástæða til að hafa áhyggjur enda er allt opið í þessu einvígi ennþá.

Spáin að þessu sinni er sú að við getum loksins tekið gleðivísitöluna aðeins uppávið í kvöld og Liverpool fer áfram í keppninni. Þetta verður auðvitað mjög spennandi því ég ætla að giska á að Leipzig skori fyrsta mark leiksins. Taugarnar verða þandar eftir það en jöfnunarmark Liverpool kemur seint í leiknum og lokatölur 1-1.


Fróðleikur:

- Liverpool hafa aldrei tapað tveggja leikja einvígi í Evrópukeppni eftir að hafa unnið fyrri leik á útivelli.

- Aðeins einu sinni áður í sögu félagsins hefur liðið leikið tveggja leikja einvígi á sama vellinum. Tímabilið 1989-1990 léku Liverpool og Wigan báða leikina í 2. umferð Deildarbikarsins á Anfield og þá var seinni leikur liðanna "útileikur" Liverpool.

- Liverpool hafa til þessa spilað 40 leiki á tímabilinu, unnið 19, gert 10 jafntefli og tapað 11 leikjum. Ekki skemmtileg tölfræði það.

- Aðeins hefur tekist að halda markinu hreinu í 13 leikjum af þessum 40.

TIL BAKA
Nýlegar fréttir
Fleiri fréttir
Fréttageymslan