Breytingar á leikjum

Ný leikjadagskrá hjá okkar mönnum hefur verið gefin út fyrir marsmánuð í deildinni.

Fyrsti leikur mánaðarins verður á heimavelli gegn Chelsea en upphaflega átti sá leikur að fara fram seinnipart mánaðarins. Ný dagsetning er fimmtudagurinn 4. mars og verður flautað til leiks klukkan 20:15.

Næsti leikur er einnig á Anfield þegar Fulham mæta í heimsókn, nánar tiltekið sunnudaginn 7. mars klukkan 14:05.

Mánudaginn 15. mars er svo útileikur við Úlfana sem hefst klukkan 20:00.

Fleiri deildarleikir eru ekki á dagskrá í mars þar sem landsleikjahlé er í seinni hlutanum. En það er vert að minnast á að seinni leikurinn við RB Leipzig verður spilaður miðvikudaginn 10. mars klukkan 20:00. Sá leikur fer ekki fram á Anfield vegna Covid-19 ástandsins í Evrópu og samkvæmt nýjustu fréttum er búist við ákvörðun um leikstað í þessari viku.