| Grétar Magnússon

Spáð í spilin

Úlfarnir mæta í heimsókn á Anfield í næsta leik í deildinni. Leikurinn hefst klukkan 19:15 sunnudaginn 6. desember. Það er fagnaðarefni að loksins mega áhorfendur mæta á Anfield að nýju, reyndar bara 2.000 manns en það er samt betra en ekkert.

Aldrei þessu vant fá okkar menn "langt" frí á milli leikja en eftir sigurinn á Ajax á þriðjudagskvöldið gat Jürgen Klopp glaðst yfir því að næsti leikur væri á sunnudegi. Það gæti meira að segja vel farið svo að þeir Trent Alexander-Arnold og Naby Keita verði klárir í slaginn en báðir hófu æfingar að nýju í vikunni. Sem fyrr eru svo þeir Alisson, Gomez, van Dijk, Oxlade-Chamberlain, Milner, Shaqiri og Thigao ennþá frá keppni. Henderson og Robertson eru sagðir glíma við smávægileg meiðsli en þar sem leikurinn í miðri viku, gegn Midtjylland, er bara formsatriði má gera ráð fyrir að þeir spili gegn Úlfunum og fái svo kærkomna viku hvíld. Það verður sennilega mest spennandi að sjá hver verður á milli stanganna en frammistaða Kelleher í vikunni ætti að gefa Klopp smá höfuðverk yfir því hvort hann treysti Adrián til verksins eða ekki. Úlfarnir verða án helsta markaskorara síns, Raúl Jiménez og þá er meiðslalistinn þeirra svo gott sem upptalinn en varnarmaðurinn Jonny er hinn leikmaður þeirra sem er meiddur.

Síðan Úlfarnir komust aftur upp í úrvalsdeild hafa liðin mæst tvisvar á Anfield og Liverpool unnið báða leiki, 2-0 og 1-0. Leikur liðanna á síðasta tímabili var mjög erfiður fyrir okkar menn og þeir máttu hafa sig alla við til að sigra, reyndar gætti töluverðrar þreytu hjá þeim rauðu þar sem leikurinn var í lok desember og leikjaálagið hafið verið gríðarlegt í mánuðinum í deild og Heimsmeistarakeppni félagsliða. Ef við skoðum hvernig gestaliðið hefur staðið sig af er þá má segja að þeir hikstuðu aðeins í byrjun tímabils, sigruðu reyndar Sheffield United í fyrsta leik en töpuðu næstu tveim. Þeir náðu taplausum október með þrem sigrum og einu jafntefli, hófu nóvember á því að tapa fyrir Leicester, gerðu svo jafntefli við Southampton en í síðasta leik mættu þeir á Emirates völlinn, gerðu sér lítið fyrir og sigruðu 1-2. Þeir eru klárlega að ná sínum vopnum að nýju og mæta með gott sjálfstraust til Liverpool borgar, væntanlega með það fyrir augum að nýta sér meiðslavandræði heimamanna.

Það verður fróðlegt að sjá hvað Diogo Jota gerir gegn sínum gömlu félögum en þeir ættu að þekkja sinn mann vel og hvaða brögðum hann reynir að beita. Svo er það auðvitað spurning hvort Jota verði í byrjunarliðinu á annað borð en ég hallast að því að fremstu þrír verði Salah, Mané og Jota og Firmino fái sér sæti á bekknum. Miðjan verður skipuð Henderson, Jones og Wijnaldum og aftastir verða Neco Williams, Matip, Fabinho og Robertson. Giska á að Klopp setji Adrián í markið svona uppá reynsluna að gera en það kemur allt í ljós.

Spáin að þessu sinni er sú að okkar mönnum tekst að knýja fram 2-1 sigur í mjög hröðum og skemmtilegum leik. Endurkoma áhorfenda, þó fáir séu, mun virka sem vítamínssprauta á heimaliðið og gefa auka orku til að skora sigurmarkið um miðjan seinni hálfleikinn. Vonum nú að aðalumræðan eftir leik verði ekki um VAR og allt það bull, heldur frábæra spilamennsku á Anfield hjá okkar mönnum.

Fróðleikur:

- Liverpool eru með 21 stig í deildinni eftir 10 leiki.

- Úlfarnir eru í 10. sæti með 17 stig.

- Mohamed Salah er markahæstur leikmanna Liverpool það sem af er tímabils með 10 mörk í öllum keppnum, þar af átta í deild.

- Raúl Jiménez er markahæstur Úlfanna með 4 mörk í deildinni.




TIL BAKA
Nýlegar fréttir
Fleiri fréttir
Fréttageymslan