| Sf. Gutt

Spáð í spilin

Liverpool vs Atalanta

Það er langt síðan Liverpool hefur byrjað riðlakeppni Meistaradeildar jafn vel. Þrír sigrar eftir þrjá leiki og mótherjarnrir hafa enn ekki skorað hjá Englandsmeisturunum. Áframhald í útsláttarkeppnina er svo til tryggt en samt eru þrír leikir eftir í riðlinum.


Sigur á Atalanta annað kvöld tryggir sigur í riðlinum. Liverpool setti met í fyrri leik liðanna með því að vinna 0:5. Þetta var stærsti sigur Liverpool á Ítalíu í allri Evrópusögu félagsins. Einhverjir myndu kannski telja að sá sigur þýði öruggan sigur á Anfield. Það er þó ekkert fast í hendi í knattspyrnunni.


Ef mið er tekið af leiknum á Ítalíu þá ætti Liverpool að vinna á Anfield. Það er þó spurning hvaða leikmönnum Liverpool teflir fram. Liverpool á nefnilega leik strax um hádegið á laugardaginn í Brighton. Lygilegt að sjónvarpsstöðvar á Englandi komist upp með leikjauppröðun af þessu tagi og í raun óboðlegt! Jürgen Klopp gagnrýndi leikjauppröðun harðlega eftir leik Liverpool og Leicester City á sunnudaginn og full ástæða til. 

Það þýðir þó ekki að kvarta um of heldur þarf að vinna úr stöðunni. Trúlega verða nokkrar breytingar gerðar á liði Liverpool með tillitis til leiksins við Brighton. Það er þó ekki gott að ráða í hverjar þær verða. Naby Keita meiddist á móti Leicester en Mohamed Salah er aftur til taks.

Ítalska liðið mun örugglega reyna að bæta fyrir niðurlæginguna í fyrri leiknum en vonandi nær Liverpool að fylgja sterkum sigri á Leicester á sunnudagskvöldið eftir. Ég spái því að Liverpool vinni 2:1. Mohamed Salah og Diogo Jota skora mörkin.

YNWA!


TIL BAKA
Nýlegar fréttir
Fleiri fréttir
Fréttageymslan