| Grétar Magnússon

Spáð í spilin

Í kvöld er gigg hjá okkar mönnum þegar þeir taka á móti Arsenal á Anfield, leikurinn hefst klukkan 19:00.

Jürgen Klopp sat fyrir svörum á blaðamannafundi á föstudaginn var og fór auðvitað yfir stöðu leikmanna hvað meiðsli varðar. Joe Gomez gæti verið klár fyrir þennan leik en hann átti að hefja æfingar að fullu fyrir helgina. Jordan Henderson verður ekki með eftir að hafa meiðst lítillega gegn Chelsea. Þær fréttir bárust svo um helgina að þeir Alisson og Thiago voru ekki með á æfingu á laugardaginn. Það væri vissulega vont að missa Alisson út úr liðinu því ekki hefur Adrián verið að sannfæra okkur mikið þegar hann hefur þurft að byrja. Þeir Joel Matip og Alex Oxlade-Chamberlain eru svo áfram á meiðslalistanum margfræga. Hjá Skyttunum eru sjö leikmenn meiddir skv. nýjustu tölum, flestir þeirra reyndar leikmenn sem kallast minni spámenn en þeirra helstu kanónur ættu að vera klárar í þennan leik.

Bæði lið hafa unnið fyrstu tvo leiki það sem af er tímabilinu. Arsenal unnu nokkuð sannfærandi sigur á Fulham í fyrsta leik og lentu svo í smá basli með West Ham á heimavelli en höfðu sigur 2-1. Undanfarin ár hafa leikir þessara liða á Anfield verið veisla fyrir augu okkur stuðningsmanna en síðustu fjórir leikir hafa unnist með markatölunni 15-3. Síðasti leikur liðanna á Anfield endaði 3-1 þar sem Joel Matip og Mohamed Salah (2) skoruðu mörkin en Torreira skoraði sárabótamark fimm mínútum fyrir leikslok.

En eitthvað segir mér að leikur kvöldsins verði enginn gangur í garðinum fyrir okkar menn. Mikel Arteta hefur náð að skipuleggja leik sinna manna mjög vel eftir að hann tók við, varnarleikurinn er agaður og menn vita sín hlutverk. Gæðin framá við eru svo mikil eins og við þekkjum og liðið getur sótt hratt upp völlinn. Síðustu tveir leikir liðanna hafa endað vel fyrir Arsenal, sigur á Emirates (reyndar þegar okkar menn voru orðnir meistarar) og sigur eftir vítaspyrnukeppni í Góðgerðaskildinum. Skytturnar gætu því mætt í þennan leik með gott sjálfstraust. Það skal þó tekið fram að sigur þeirra á Emirates í sumar var eins ósanngjarn og hægt er, bæði mörkin voru gjöf frá okkar mönnum og hinumegin á vellinum voru okkar bestu menn ekki á skotskónum. En úrslitin ljúga ekki og nú er kominn tími til að vinna sigur á Arsenal á ný.

Spáin að þessu sinni er sú að það tekst nú að vinna sigur, lokatölur verða 3-1 þar sem flest mörkin koma í seinni hálfleik.



TIL BAKA
Nýlegar fréttir
Fleiri fréttir
Fréttageymslan