Eitt hundrað mörk!

Þegar Emre Can skallaði boltann í mark West Ham United í gær hafði Liverpool skorað 100 mörk það sem af er þessarar leiktíðar. Eru þá tekin mörk í öllum keppnum. Mörkunum fjölgaði svo upp í 103 áður en leik lauk. 

Þetta verður að teljast magnaður árangur því febrúar hefur enn ekki runnið sitt skeið. Á öllu árinu 2017 skoraði Liverpool 111 mörk ef rétt er vitað. 


Mohamed Salah bætti marki í safn sitt og hefur þar með skorað 31 mark af þessum 100. Hann er nú búinn að jafna bestu markatöluna sem Luis Suarez náði á ferli sínum með Liverpool á leiktíðinni 2013/14. Luis skoraði þá öll mörk sín í deildinni og jafnaði markamet sem Alan Shearer og Cristiano Ronaldo höfðu áður sett yfir mörk í Úrvalsdeildinni eftir að hún var stofnuð. Það verður áhugavert hversu mörg mörk Moahmed nær að skora áður en þessi sparktíð endar.