| Heimir Eyvindarson

Á morgun mun sólin skína

Jürgen Klopp kýs að taka það jákvæða úr tapleiknum gegn West Ham í gærkvöldi. Nú verði menn að gleyma vonbrigðunum og halda áfram, þótt útlitið sé ekki sérstaklega bjart í augnablikinu. 

Það var verulega svekkjandi að horfa á Liverpool liðið falla út úr FA-bikarnum eftir 120 mínútna leik í gærkvöldi. Leik þar sem Liverpool var síst verri aðilinn, en gaf andstæðingnum tiltölulega auðveld mörk. Hversu oft höfum við ekki séð það gerast?

Jürgen Klopp er vitanlega vonsvikinn með tapið en hann sér þó margt jákvætt við leikinn. Til að mynda var hann afar ánægður með ungu leikmennina sem fengu að spreyta sig í gær, en Liverpool stillti upp liði með meðalaldur upp á 23 ár um það bil. 

„Flanno er nýkominn úr gríðarlega erfiðum meiðslum, en hann spilaði 120 mínútur í gær. Frábær. Tiago Ilori er ungur og ekki í leikformi, hann spilaði allan leikinn og stóð sig mjög vel. Brad Smith og Lucas stóðu sig einnig mjög vel. Smith var hættur hjá félaginu fyrir nokkrum vikum og Lucas spilaði út úr stöðu. Á miðjunni léku unglingarnir Chirivella og Stewart stórt hlutverk og stóðu fyllilega undir því."

Stjórinn var einnig ánægður með endurkomu Daniel Sturridge. 

„Daniel spilaði helmingi meira í gær en við vonuðumst til en hann leit mjög vel út. Við munum meta það í samvinnu við hann og læknateymið hvort hann getur byrjað leikinn gegn Aston Villa á sunnudaginn. Fyrst þarf hann að jafna sig eftir þennan leik."

„Það hefur ekki gengið nægilega vel að undanförnu. Við glutruðum leiknum gegn Sunderland niður, stjórinn fékk botnlangabólgu og við duttum út úr bikarnum. En á morgun mun sólin skína, ef við viljum að hún skíni. Tökum það jákvæða úr þessum leik og höldum uppbyggingunni áfram."






TIL BAKA
Nýlegar fréttir
Fleiri fréttir
Fréttageymslan