Flanagan þarf að fara í aðgerð

Þær slæmu fréttir bárust í dag að Jon Flanagan þarf að fara í aðgerð á vinstra hné og verður hann frá í nokkra mánuði vegna þessa.


Bakvörðurinn ungi hefur verið frá vegna meiðsla allt tímabilið vegna vökvasöfnunar í hnénu en hann hlaut meiðslin á undirbúningstímabilinu. Nánar tiltekið í keppnisferðinni í Bandaríkjunum. Hann spilaði síðast æfingaleik við Preston snemma í júlí.

Samkvæmt áætlun átti hann að hefja æfingar að nýju í þessum mánuði en þar sem hann fann ennþá til óþæginda í hnénu var tekin ákvörðun um að gera aðgerð á því. Verður að segja að þetta eru mikil vonbrigði fyrir Flanagan sem kom sterkur inn á síðasta tímabili og hann er ekki langt frá því að skrifa undir langtíma samning við félagið.

Einnig er ljóst að þeir Daniel Sturridge, Joe Allen, Emre Can og Glen Johnson eru allir á meiðslalistanum og verða ekki klárir í slaginn gegn West Ham á laugardaginn.

Martin Skrtel er þó búinn að ná sér af sínum meiðslum og Lazar Markovic er tiltækur á ný eftir að hafa verið í banni á þriðjudaginn í Meistaradeildinni.