Kaupin á Balotelli staðfest

Nú rétt í þessu staðfesti opinber heimasíða félagsins að kaupin á Ítalanum Mario Balotelli séu gengin í gegn.


Balotelli er 24 ára gamall og kemur frá AC Milan en hann lék áður með Manchester City á Englandi og Inter Milan á Ítalíu. Er hann níundi leikmaðurinn sem kemur til félagsins í sumar.

Hann hafði þetta að segja í sínu fyrsta viðtali: ,,Ég er mjög ánægður. Það hefur verið rætt áður að koma hingað og nú er ég ánægður með að vera kominn."

,,Liverpool eru eitt besta lið Englands og knattspyrnan sem er spiluð hér er mjög góð. Þetta er gott lið með unga leikmenn og þess vegna kom ég."

Balotelli hafði verið hjá AC Milan í eitt og hálft ár þar sem hann skoraði 30 mörk í 54 leikjum. Eins og áður sagði spilaði hann áður á Englandi með Manchester City þar sem hann vann ensku Úrvalsdeildina árið 2012.

Hann hefur einnig unnið á sínum ferli Meistaradeildina með Inter Milan, þrjá deildartitla í ítölsku Seria A og FA bikarinn.

Hann hefur spilað 33 landsleiki fyrir Ítalíu og skorað í þeim 13 mörk.