| Sf. Gutt

Spáð í spilin

                                                                         Liverpool v Newcastle United

Liverpool getur orðið Englandsmeistari á morgun í 19. sinn! En til að draumur okkar stuðningsmanna Liverpool geti orðið að veruleika þarf ýmislegt að gerast. Í fyrsta lagi þarf Liverpool að vinna Newcastle United á Anfield Road. Í annan stað þarf Manchester City að tapa fyrir West Ham United á heimavelli sínum. Svo einfalt er þetta nú og svo er reyndar möguleiki á að Liverpool vinni titilinn með því að vinna Newcastle svona eins og 13:0 og Manchester City geri jafntefli.

Síðari möguleikinn er nú varla raunhæfur því metsigur Liverpool í sögunni er 11:0. Fyrri möguleikinn er kannski líka fjarlægur því Manchester City á að vinna öruggan sigur á West Ham United. Liðið raðaði inn níu mörkum gegn engu á móti Hömrunum í tveimur leikjum í undanúrslitum Deildarbikarsins og vann líka útileikinn í deildinni. Það er því fátt sem bendir til þess að Manchester City muni misstíga sig á morgun.

En kraftaverk hafa gerst og gerast og ég trúi á kraftaverk. Maður er ekki skírður og fermdur fyrir ekki neitt. Ég trúi því að Liverpool verði Englandsmeistari á morgun. Að minnsta kosti þar til annað kemur í ljós. Það er þó á hreinu að Liverpool þarf á mikilli og reyndar mjög mikilli hjálp að halda til að draumur okkar stuðningsmanna Liverpool verði að veruleika um kaffileytið 11. maí 2014.


Við höfum þó þrjá fyrrum leikmenn okkar í röðum Liverpool og þeir munu alveg örugglega leggja sig alla fram verði þeir valdir í liðið hjá West Ham. Joe Cole, Stewart Downing og Andy Carroll verða okkar menn og ekki má gleyma Kevin Nolan, fyrirliða West Ham, sem oft hefur gert Liverpool erfitt fyrir. Hann er þó fæddur í Liverpool og er grjótharður stuðningsmaður Rauða hersins. Það geta allir verið vissir um að hann vill að Liverpool vinni titilinn!



Það verður algjörlega rafmagnað andrúmsloft á Anfield og gestirnir frá Newcastle koðna gersamlega niður. Þeir munu einfaldlega ekki eiga nokkra einustu möguleika og Liverpool vinnur í það minnsta 5:0! Luis Suarez skorar tvö og þeir Steven Gerrard, Raheem Sterling og Jordan Henderson eitt hver. Á heimavelli Manchester City munu gerast undur og stórmerki sem gera það að verkum að Steven Gerrard tekur við Englandsbikarnum á Anfield Road!!!!!!!!!!!

YNWA

Svona upp á gamlan kunningsskap þá látum við spá Mark Lawrenson fylgja með. Þetta er jú síðasta umferðin á leiktíðinni. 

Newcastle marði sigur á Cardiff í síðustu viku. Þeir unnu 3:0 en tvö mörk undir lokin gerðu sigurinn meira sannfærandi en hann í raun var. Ég held að sigurinn sem endaði sex leikja taphrinu þýði ekki að vandamál þeirra séu að baki. Skjórarnir geta ekki beðið eftir að leiktíðin endi en sumarið verður áhugavert vegna þess að framtíð eigandans Mike Ashley og framkvæmdastjórans Alan Pardew er á mikilli huldu.

Titilatlaga Liverpool hefur runnið út í sandinn í síðustu tveimur leikjum en þrátt fyrir það þá hefur liðið átt framúrskarandi leiktíð því í ágúst átti enginn von á því að það kæmist svona nærri því að vinna deildina. Fólk segir að Brendan Rodgers hafi bara eina leikaðferð en hann er ekki með nógu marga leikmenn til að breyta liðinu og leikaðferð þess. Brendan þarf núna að byggja ofan á þennan árangur með því að styrkja liðshópinn sinn.

Það er góð stemmning í kringum allt hjá Liverpool núna. Það á að stækka Anfield og eina blikan sem ég sé á lofti er sú ef Real Madrid myndi ákveða að selja Karim Benzema í sumar. Ef þeir gera það þá hef ég á tilfinningunni að þeir muni gera atlögu að því að kaupa herra Luis Suarez í hans stað. Ég vona þó að ég hafi rangt fyrir mér.

Úrskurður: 3:0.



 


    
TIL BAKA
Nýlegar fréttir
Fleiri fréttir
Fréttageymslan